WAWILI WAFA,40 WAJERUHIWA AJALI YA BASI MKOANI SINGIDA

Kamanda Geofrey Kamwela

Watu wawili akiwemo mtoto wa miezi sita wamekufa na wengine 40 kujeruhiwa katika ajali ya barabarani, iliyolihusisha basi la Zuberi katika eneo la Tumaini Nkuhi kwenye barabara kuu ya Singida – Dodoma. Kamanda wa Polisi wa Mkoa wa Singida, Geofrey Kamwela alisema mjini hapa kuwa ajali   hiyo ilitokea jana saa 7:15 mchana na ilihusisha gari la abiria la Zuberi, lenye namba za usajili T.119 AZZ Scania.

Alitaja waliokufa kuwa ni Sivilari Aloyce “Logotio” ( miezi 6) na mwanamke mmoja mtu mzima aliyepandia Shinyanga, ambaye jina lake halikuweza kupatikana. Alisema miili yao imehifadhiwa

hospitali ya mkoa ikisubiri ndugu zao. Akieleza ajali ilivyotokea, Kamwela alisema basi hilo lilikuwa linatoka Mwanza kwenda Dar es Salaam na lilipofika sehemu hiyo, alitokea mtu mmoja barabarani ambaye alikuwa anayumba, kiasi cha kumbabaisha dereva Fadhili Kalembo.“Katika juhudi za kumkwepa

mwenda kwa miguu huyo, basi lilipoteza mwelekeo kasha kupinduka na kusababisha vifo vya watu wawili na majeruhi” alisema Kamanda.

Alisema baada ya ajali hiyo kutokea, mwenda kwa miguu huyo alitokomea kusikojulikana. Mganga Mfawidhi wa Hospitali ya Mkoa wa Singida, Dk Deogratius Banuba alisema majeruhi wanne wamepewa rufaa kwenda Hospitali ya KCMC Moshi, kutokana na hali zao kuwa mbaya. Alisema wengine 36 wanaendelea kupatiwa matibabu hospitalini hapo. 

Hii ni ajali ya pili kutokea kwenye eneo hilo katika kipindi kisichozidi wiki mbili. Januari 19, mwaka huu watu 13 walikufa papo hapo, baada ya gari aina ya Noah, kugongana uso kwa uso la lori la mizigo

kwenye eneo la Isuna.