POLISI YA KENYA YAKAMATA MTUHUMIWA 1, INAWATAFUTA WENGINE KUHUSIANA NA MLIPUKO WA BASI PANGANI

Polisi ya Kenya siku ya Jumapili (tarehe 15 Desemba) ilimtia mbaroni mtuhumiwa mmoja kuhusiana na mlipuko ndani ya basi katika eneo la Pangani jijini Nairobi ambao uliua watu sita na kujeruhi wengine wapatao 30, AFP iliripoti.

Mkuu wa Polisi wa Nairobi Benson Kibue alisema kwamba mtuhumiwa huyo alikuwa akihojiwa juu ya shambulio la Jumamosi kwenye basi la watu 32 ambalo sehemu yake ya nyuma iling'olewa kwa mlipuko huo.

"Tumemshikilia mtuhumiwa mmoja aliyekamatwa mara tu baada ya tukio. Anatusaidia katika uchunguzi," Kibue alisema, na kutoa tahadhari kamba ilikuwa mapema sana kusema iwapo mtu huyo "alihusika moja kwa moja katika shambulio".

Waranti pia ilikuwa imetolewa kwa kumkamata mtuhumiwa wa pili, mwenye umri wa miaka 21, Hussein Nur Mohamed. Polisi walichapisha picha ya Mohamed na kutoa wito kwa wananchi kujitokeza wakiwa na habari yoyote ile.

Polisi wanafanyakazi kuamua iwapo mripuko huo uliokuwa wa nguvu kubwa ulisababishwa na guruneti au chombo cha mlipuko cha kutengeneza, na iwapo chombo hicho kilikuwa ndani ya basi, kikiwa kimechukuliwa na abiria au kilirushwa kutoka nje.

Mlipuko huo ulizipiga gari kadhaa karibu na basi, na kuua angalau mwendesha pikipiki mmoja, kwa mujibu wa mashuhuda.

Lilikuwa shambulio la nne ndani ya wiki ambayo Kenya iliadhimisha miaka 50 ya uhuru wake kutoka Uingereza, ikiwa ni pamoja na jaribio la shambulio kwa watalii wa Kiingereza huko Mombasa na shambulio kwa polisi wa Kenya karibu na mpaka wa kaskazini mashariki na Somalia.

Ijumaa iliyopita, siyo chini ya mtu mmoja aliuawa na wengine watatu kujeruhiwa vibaya sana wakati milipuko miwili kuutikisa mji wa Wajir kwa wakati mmoja, polisi walisema, jambo linaloashiria kwamba ilionekana kama kazi ya wapiganaji wa al-Shabaab au wafuasi wao.

Hakuna mahusiano yaliyowekwa baina ya mashambulio hayo, ambao hakuna kikundi chochote kilichodai kuhusika.

Siku ya Jumamosi, hali ilikuwa shwari huko Eastleigh baada ya polisi siku ya Jumamosi jioni kuwatawanya watu waliokuwa wanafanya fujo katika mtaa ambako mlipuko huo ulitokea.